Hari Sampah Nasional

Hari Sampah Nasional mula diartion saro Mandailing manjadi Ari Asar/Osar Nasional na dirayaon satiop tanggal 21 Februari sian 2015 nalewatan. Aso porlu ita marayaonna, ima anso ibaen bahan marpikir ato roaonkonon so ulang sumbarangan hita mangambukon asar arana nagodangan do akibatna natarjadi tu hita bope tu alak nabahat. Sabagian kalak dihita alak Mandailing atao Indonesia maranggapan mangambukon asar sumbarangan manjadi hal nabiaso tarjadi di na marmasyarakat boti buse namarkampung arana pamikiran nita maranggapan inda angkan najadi masalah baen nabolak dope pangambukonan niasar dikampung dot batang aek na godang dot doras dope mangalir mangayupkon osar naita baen. Porlu rap ita boto bahaso mulo mulo dirayaon ari osar nasional on baen na adong do kajadian mate marratus alak tartimbun asar arana masursur baen ginjangni timbunonna di pangambukonan ni asar i.

Kajadian i tarjadi di pangabukonan asar Leuwigajah di kampung adat Cireundeu kota Cimahi, urang lobina 150 alak mate tartimbun saat kajadian arana ni sursuran nganan ni asar salanjang 200 meter dot ginjangna 60 meter arani udan nagogo natarjadi saat i. On ma sada kajadian salain banjir nasaharusna jadi rap parsiajaran diita anso ulang mangambukon asar sumbarangan targan sotarjadi buse kajadian naumparah ngoni tuhita bope tu alak nalain. Salain i, naporlu rap ita parsiajari sondia itaen carana anso ulang mangambukon asar kalak sumbarangan.

Carana bisa ita baen pangartian tu alak dikampung bope di Indonesia bahaso asar nitai bisa do iolah hususna asar nasian lobi lobi ni panganon ngon bagas dot ngon dapur bisa do iolah dot dipature manjadi um marmanfaat bahkan bisa manghasilkon epeng asalkon mamboto cara mamili dot manyarak asar nasajenis dungi mamboto sanga sondia ibaen mangolahna. jadi salain i porlu hita rap marsiajar dot mangajarkon sanga sondia carana mambaen asar so ra marmanfaat dot manghasilkon epeng. Mulo dung mangarti hita sondia mangolah asar so marmanfaat dot manjadi epeng, turanna markurang dei alak mangambukon asar arana mula alak dikampung najopan roa nalai i nasonian apalagi nara manghasilkon epeng.

Carana bisa ita baen mangolah asar ima naparjolo angkon na ita pasarak asar na marasal sian suan suanan atau na sian binatang dot asar namarasal sian palastik bope bokas nganan ni ubat bage. Dungi ita karejoon naian tinggal ita olah ma asar na sian suan suanan i bisa manjadi pupuk kompos, eco enzyme, ato tu bontuk nalain anso bisa dipargunaon mulakan dungi um godang manfaatna sian naparjolo. Dungi mulo asar palastik bisa ita gunaon urangi panggunaanna, ipake mulakan pala nasabangso natarpargunaon mulakan dungi baru pala inda tar pargunaon be baru iolah tu bontuk nabaru so tar manfaatkon mulakan, mulo sacara saro istilahna idokon 3R (Reduce, Reuse, Recycle). Pala iterjemahkon tu saro Mandailing manjadi iurakan, ipargunaon mulakan, iolah mulakan, maksudna iurakan jolo parjolo panggunaan ni asar i mulo inda taruraki be baru ipargunaon mulakan pala sabangso natar pargunaon pala inda tar pargunaon be baru diolah asar nai so hasilna bisa ipargunaon mulakan.

Mulo marhasil ita mangolah bope manggunaon asar sadenggan dengganna nabahatan do kauntungan pope manfaatna di hita. Naparjolo manfaatna bisa mangurangi na manggunaon panaet ni api dot panggonti ni pupuk di bagas, salain i bisa manguraki manyababkon muop bau di sakitar nita, napaling utamo sian asar i bisa manghasilkon epeng nabahat itamba mangurangi pangaluaran balanjo dibagas. Napaling utamo naporlu ita sapahamkon tu alak nabahat bahaso ulang kita maranggapan asar i indadong guna na, mulo mangarti ita manggunaonna epeng godang doi asar i dungi bisa jadi usaho nagodang do ipaenna pala pature asar.

Mula leng so tarora do tong alak mangambukon asar sumbarangan ulang ita tokin nai manyalaon pamarintah atau Tuhan pula tarjadi bala nagodang arani kalakuanta naso denggan tu pukarangan nita, arana copat ato lambat pasti tarjadi do bala pala ita manajalaki gara gara tu huta nita. aha naita baen bakal mulak tu hita na mambaen nai.